Tështitja

Tështitja


Tështiu dikush
E dikush tjetër tha
"E vërtetë qenka ajo që thashë".
Nuk di qysh kur
Kjo teoremë ka dal'
Mbase kur lindi fjala e lashtë.

Mbase më parë
Një e tështirë
Ishte një mendim i pashprehur.
Mbase një fjalë
Ishte një dëshirë
Që flinte shpirtit e fshehur.

Mbase dikur
Një e tështirë
Ishte sinjal perëndie.
Që sytë t'i mbyll
Dhe të vjen mirë
Të kesh magji profecie.

Ç'më qeshet tani
Me këto hamendje
Kur dora më ndal për të shkruar
Sepse po tështi
Pa thënë një thënie
Ta bind të dashurën që dua.